ନୂଆଦିଲ୍ଲୀ: ଉତ୍ତର ଭାରତରେ ଏକାଧିକ ପଶ୍ଚିମା ଝଡ଼ ସକ୍ରିୟ ହେବା ଯୋଗୁଁ ଦେଶର ବିଭିନ୍ନ ରାଜ୍ୟରେ ପାଣିପାଗ ବିଗିଡ଼ିବାକୁ ଯାଉଛି। ଭାରତୀୟ ପାଣିପାଗ ବିଭାଗ ଅନୁଯାୟୀ, ଦୁଇଟି ନୂଆ ପଶ୍ଚିମା ଝଡ଼ ପ୍ରଭାବରେ ଉତ୍ତର ପ୍ରଦେଶ, ଦିଲ୍ଲୀ, ବିହାର ଏବଂ ଝାଡ଼ଖଣ୍ଡ ସମେତ ଅନେକ ରାଜ୍ୟରେ ପ୍ରବଳ ବର୍ଷା, ବଜ୍ରପାତ ଏବଂ କୁଆପଥର ମାଡ଼ ହେବା ସମ୍ଭାବନା ରହିଛି। ୭ ଏବଂ ୮ ଏପ୍ରିଲରେ ଏହି ପାଣିପାଗ ଗତିବିଧି ତୀବ୍ର ହେବ ବୋଲି ସତର୍କ କରାଯାଇଛି। ବିଶେଷ କରି ୭ ଏପ୍ରିଲରେ କାଶ୍ମୀର ଘାଟିର କେତେକ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ। ସେହିପରି ମଧ୍ୟ, ପୂର୍ବ ଏବଂ ଦକ୍ଷିଣ ଭାରତରେ ୯ ଏପ୍ରିଲ ପର୍ଯ୍ୟନ୍ତ ବିଜୁଳି ଘଡ଼ଘଡ଼ି ସହ ବର୍ଷା ଜାରି ରହିବ।
ପାଣିପାଗ ବିଭାଗର ସୂଚନା ଅନୁଯାୟୀ, ପଶ୍ଚିମ ମଧ୍ୟପ୍ରଦେଶରେ ୮ ଏପ୍ରିଲ ଏବଂ ବିହାରରେ ୬ ଓ ୮ ଏପ୍ରିଲରେ କୁଆପଥର ମାଡ଼ ହେବା ଆଶଙ୍କା ରହିଛି। ସେହିପରି ଝାଡ଼ଖଣ୍ଡରେ ୬ ରୁ ୮ ଏପ୍ରିଲ ମଧ୍ୟରେ ପାଣିପାଗ ଅସ୍ଥିର ରହିବ। ପଶ୍ଚିମବଙ୍ଗ ଏବଂ ସିକ୍କିମରେ ମଧ୍ୟ ୭ ଏବଂ ୮ ଏପ୍ରିଲରେ ପ୍ରବଳ ବର୍ଷା ସହ ପବନ ବହିବାର ସମ୍ଭାବନା ଅଛି। ଏହି ପଶ୍ଚିମା ଝଡ଼ ପ୍ରଭାବରେ କୃଷି କାର୍ଯ୍ୟ ପ୍ରଭାବିତ ହେବାର ଆଶଙ୍କା ଥିବାରୁ ଚାଷୀମାନଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି। ପାଣିପାଗରେ ଏହି ପରିବର୍ତ୍ତନ ଯୋଗୁଁ ଅନେକ ସ୍ଥାନରେ ତାପମାତ୍ରା ହ୍ରାସ ପାଇବା ସହ ଲୋକଙ୍କୁ ପ୍ରବଳ ଗ୍ରୀଷ୍ମ ପ୍ରବାହରୁ ଆଶ୍ୱସ୍ତି ମିଳିପାରେ।
